Serikali yaendelea na tathmini ya magugu maji Ziwa Victoria

Posted By Bajeti: 2025-02-06 07:30:52 |

Share: Facebook | Twitter | Whatsapp | Linkedin Visits: 66

Serikali yaendelea na tathmini ya magugu maji Ziwa Victoria

NA MWANDISHI WETU,DODOMA

NAIBU Waziri Ofisi ya Makamu wa Rais (Muungano na Mazingira) Khamis Hamza Khamis amesema Serikali inaendelea na tathmini ya uwepo wa magugu maji katika Ziwa Victoria ili kupatia ufumbuzi changamoto hiyo.

Khamis ametoa kauli hiyo bungeni  jijini Dodoma Januari 31, 2025 wakati akijibu swali la Mbunge wa Geita Mjini Constantine Kanyasu aliyetaka kujua kama Serikali inafahamu ongezeko la magugu maji katika Ziwa Victoria ikiwemo  athari za magugu hayo na mpango wa kuyadhibiti.

Amesema Serikali imechukua jitihada za kudhibiti magugu maji katika ziwa hilo ambapo Ofisi ya Makamu wa Rais imeandaa na kutekeleza Mkakati na Mpango Kazi wa Taifa wa Kukabiliana na Viumbe Vamizi wa mwaka 2019-2029 ambao unatoa mwongozo wa namna ya kuzuia kuingia na kuenea kwa viumbe vamizi na una mipango endelevu ya kushughulikia viumbe vamizi waliopo na wale wanaoweza kuingia.

“Mheshimiwa Spika, tathmnini inaendelea na nimuombe Mheshimiwa Mbunge avute subira wakati tunaendelea kulishughulikia jambo hili kwani limeendelea kuathiri vyanzo vingi vya maji nchini kwa mfano Ziwa Jipe nalo lina changamoto ya kuzingirwa na magugu maji,” amesema Khamis.

Ameongeza kuwa Serikali inawajengea uwezo wananchi wanaoishi karibu na ziwa kuhusu namna ya kujitolea katika kazi za kutokomeza na kuenea kwa magugu maji kila yanapojitokeza ikiwemo kung’oa, kukausha na kuchoma magugu maji na kuendelea kufanya tafiti mbalimbali ili kudhibiti uharibifu mifumo ikolojia ya Ziwa Victoria. 

Aidha, magugu maji yanaleta athari kwa mazingira, uchumi na kijamii ikiwemo kupungua kwa oksijeni kwenye maji ambayo huzuia mzunguko wa hewa na mwanga wa jua hali inyosababisha vifo vya samaki na viumbe wengine wa majini, uharibifu wa mifumo ikolojia na bioanuai ya Ziwa Victoria na huathiri maeneo ya mazalia ya Samaki, shughuli za uvuvi na usafirishaji. 

Katika hatua nyingine, Naibu Waziri Khamis amebainisha kuwa Sheria ya Usimamizi wa Mazingira Sura ya 191 imeweka msisitizo kwa miradi yote mikubwa ni lazima ifanyiwe tathmini ya awali ya athari za mazingira kabla ya mradi kuanza ili kuepuka uharibifu wa mazingira.

Aidha ameongeza kuwa Sheria pia inahimiza wananchi kuhamasishwa kushiriki katika uhifadhi wa mazingira kupitia elimu, sheria ndogo za serikali za mitaa, na mipango ya hifadhi ya mazingira.

Katika hatua nyingine Waziri Khamis amejibu swali la Mbunge wa Bahi  Kenneth Nollo aliyetaka kujua Serikali ina mpango gani wa kuweka Sheria kali  kudhibiti uharibifu wa mazingira nchini.

Akifafanuwa kuhusu swali hilo Khamis,ameeleza kuwa Sheria hiyo imeweka msisitizo wa udhibiti wa uharibifu wa mazingira kwa kukataza uchafuzi wa maji, hewa, na udongo kupitia kemikali za viwandani, kilimo, na shughuli nyingine za binadamu.

‘’Serikali kupitia Wizara ya Maji imetenga fedha Sh.Bilioni 1.08 kwa ajili ya ukarabati wa Bwawa la Kalemawe lililopo katika Wilaya Same mkoani Kilimanjaro.

Akijibu swali la Mbunge wa Viti Maalum Naghenjwa Kaboyoka aliyetaka kujua Serikali ina mpango gani wa kuondoa tope lililojaa katika Bwawa la Kalemawe – Same,Khamis amesema ukarabati umepangwa kufanyika katika robo ya nne ya mwaka wa fedha 2024/2025.

Ametaja shughuli zinzotarajiwa kufanyika ni pamja na kukamilisha kazi ya usanifu wa kina na kuandaa gharama kwa ajili ya ukarabati wa bwawa hilo kwa kuondoa tope, kukarabati utoro wa maji, kujenga msingi wa tuta na tuta la bwawa.